英超 vs 狼隊 ( 作客 )

barker

FT 1-2

愛華戰士

以一個相對穩陣O既防線作客攞到3分。
備注係杜古希拎夠黃牌下場要停賽。

伊禾比真係又係唔屌唔鬆化，上場踢完我地評到一文一值.....但今場入O既第一球可以話係我今屆睇愛隊入咁多球黎講其中一球最令球迷喝彩O既入球，過程好流暢。伊禾比係一個有身型有速度O既球員..缺點.係波底差，如果佢仲係希望自己拎住個波去硬爆人再傳中，呢種踢法佢完全唔會有優勢，因為佢盤球能力唔高...盤球速度低....傳中波以翼黎講更可謂差。佢今場入呢球就正正係佢放棄佢最弱O既踢法....改而善用佢優勢。右路拎到個波只係一停，之後就彈比占士然後自己走位.....CUT去禁區頂....到隊友比返波去禁區頂....以佢O既短期爆發力搵到空位起腳.....( 當然佢呢球射得靚 ---- 好多時呢D 波可以一射飛機O既....不過機會真係要自己制造.)

另一個我地又係插到飛起O既高美斯，我見佢左路傳中呢球.....佢拎住波時望返中路原本係想比隊友....但果刻中場中路佢應該係見到無隊友有空位....所以佢轉身用左腳傳中，一個靚傳就比堅尼頂入。----- > 點解我地之前要不斷插高美斯？事實上佢之前真係完全無呢類直接傳送，但明明佢真係有呢個能力，如果一個中場無創造機會能力，咁你只能做一個防中....但防中你又唔夠硬淨....咁我點解要用你？高美斯絕對係有波底......球感亦好.....佢需要O既係要多D 送出D 直接波....否則對手係好容易無視你。當對手無視你....變相隊友就會比更多人MARK 住。要入波就更難。

數據呃唔到人，今場我地各客射門係 10 對4 ，製造機會仍然係唔高....贏O既係把握力同守得住。
輸果球.....右路比人完爆.....當然杜古希追唔晒係一個問題 (我覺得佢係怕領黃牌所以唔敢出腳.)但右閘位阿賀基治企左去邊？完全唔見左人......另外當對方落底傳中時.....米拿前柱見佢例牌又係怪動作伸腳 ( 呢D 波好易輸烏龍，不過佢企位係合理)，另堅尼少少向龍門想回頂.....企位上都無乜大批評，係葛菲如果係左閘位....佢呢下波我覺得應該係企O係對方入波個球員同個波O既直線去封個路線會好D .....當然呢D 電光火石.....不過如果要提升個防守....呢D 細節野要檢討。

reedlo16

五五波，雙方其實都無乜入肉攻勢，若仔細看，其實狼隊球員狀態平均仲好我地少少。贏在把握力。

以前講過，占士和施格臣一齊出好危險…因為中場同時出佢，等於開了中門俾人。但呢場索性叫佢兩個打最前，中後場布晒重兵。又勉強可容納到兩人同時出場攻堅，當然亦因為係對面都係無鋒可用啦…

不過呢個無鋒陣，好講兩側傳送質素及中場入楔時機，呢場波甸尼係度，左邊OK，右面…伊禾比…一時時。再講中路，本來聽落中場入楔？好啱冰島臣同占士啊，但前題係你無鋒陣，即無一個中鋒同你引開對方守衛注意，人地自然睇實你，邊有你入得咁易，且兩人本身速度唔高，身形唔夠，撞都唔夠撞。如果你成隊波有西班牙、巴塞的行軍速度，咁無鋒陣進攻都WORK既…不過，唔係囉。

贏的第一球，證明甸尼的重要性，無甸尼，占士的轉向根本無目標。第二球，高美斯傳中和堅尼頂都100分，高美斯傷後，最大問題，身體對抗性及信心問題(信心又導致佢成日上波唔敢快速做啲較冒險的致命傳送)，希望佢快快回復最佳狀態。

輸個球，只能怪杜古希係左面完全比人過晒，中間個班未有時間企返啱位，遠柱結果空晒。

下場波杜古希停賽…頭痛了。

barker

reedlo16 發表於 2021-1-13 12:03
五五波，雙方其實都無乜入肉攻勢，若仔細看，其實狼隊球員狀態平均仲好我地少少。贏在把握力。

以前講過， ...

安察洛堤有計嘅, 兼且星期日作客维拉, 主隊希望延遲再踢因為主隊多人剛隔離完唔夠時間備戰分分鐘場波未必踢, 而且 Allan 快復出

wahton

我地隊波都幾得意, 近排既表現一直俾人插緊, 又贏到波攞到分

barker

wahton 發表於 2021-1-13 16:57
我地隊波都幾得意, 近排既表現一直俾人插緊, 又贏到波攞到分

踢左 17 場 10 勝 2 和 5 負呢個成績都算可以, 首先目標攞夠 40 分先, 之後希望球員表現在下半季 keep 住, 千祈唔好在操練上嬉皮笑臉

ngkk821

對球隊有期望就走樣，無期望又反彈，吹脹。無鋒陣贏波，還諗住今場有機會比Simms落場，應該之後都無機會了。另外打左咁多場TD都係唔得但哥帥都繼續出，唔通好似DCL咁潛質巨大，只係我地睇唔到，哈哈。。。

24cheung

ngkk821 發表於 2021-1-13 19:38
對球隊有期望就走樣，無期望又反彈，吹脹。無鋒陣贏波，還諗住今場有機會比Simms落場，應該之後都無機會了 ...

中埸都已冇咩選擇，焗住出佢者

ngkk821

我地鬧左DCL幾年，今年終於大爆發，可能下年輪到TD呢 哈哈。。

Forever_Fan

ngkk821 發表於 2021-1-13 19:38
對球隊有期望就走樣，無期望又反彈，吹脹。無鋒陣贏波，還諗住今場有機會比Simms落場，應該之後都無機會了 ...

TD其實才22歲，比DCL還要年輕，以這個年紀的球員來講，黃金時間應該未到才是，TD有無潛力? 年齡來講肯定有，高文係呢個年紀也是錯誤百出，但TD的缺點也是明顯，身型未夠硬淨，速度還可以，但盤扭技術和傳波準確度有待改進，差又未算，但離其他正選又有一些距離，我其實覺得TD應該外借爭取較多上場機會去進步，佢跟愛華頓好多年青球員唔同的經歷係未曾外借，以前愛華頓好多年青球員都會外借一兩年後才得到重用。