作客般尼

reedlo16

真係已到了想鬧都廢事的地步。

過去咁多場，已多次提出，(連CAHILL都講過)，後防同中場的防守聯繫做得極差，防中經常唔MARK實對方進入禁區的人，又或是中堅去補位時，防中係仍係企係禁區頂唔郁…無人補位中堅原來個空位。當然噚日失既第一球，便是阿倫同杜靴尼咁都可以面對面交失波，仲要係自己禁區頂…低級犯錯。

進攻方面，我們成條中場線，除了杜靴尼好啲外，個個都係屬於「企定定」傳球類型，教波的都會講PASS AND RUN，我們成條中場占士、高美斯、阿倫，計埋噚日個個藥煲德夫都好，無過會走位，帶波走生…。只有PASS, 但PASS前PASS後都無RUN。上場阿倫做到架喎，但今場又再成為「中場休息」的一員，個個企定定，啲波點去？  噚日伊禾比難得右路都出到唔少波，當然有幾球佢真係出得差，但出得正路個啲，中路成日得DCL一個，無人走入禁區拉開對方附守注意，點頂呢？

再退一萬步，噚日你班中場慌失失奇兵，面對面交波又失，俾波又總係差啲尺吋，高美斯噚日啲短傳俾波失了幾多球都唔想數了。

總然之，我們中場就係缺乏RUNNER，同埋班友傳波的基本功真係要加操。

我開始懷疑安帥究竟點認識佢宜家手上的球員特性。你連出德夫，都唔出下後生仔試下，係咪後者真係咁不濟？

哥頓又究竟幾時可以出來？

reedlo16

evertonlife 發表於 2020-12-6 17:24
近幾場的攻不銳守不穩，除明顯球隊對4後衛陣式更為適應外，因現時兩正選閘出缺下的調整而出現更大的適應問 ...

早係對修咸頓個場，我都話一係打4411, 一係打4231，根本宜家啲人選，打433，甚至近期兩閘正選無晒，打343都係唔啱用。我地班中堅從來都唔太適應打3中堅陣。

你班中場唔多郁，唯有靠人數補救。兩閘NKOUKOU，KENNY，前者進攻優於防守，後者防守優於進攻，則你左中場右中場剛剛好便配搭勤於防守的李察列臣和較善進攻的伊禾比，便正好彌補兩閘的不足。新人你唔俾佢落場，咁佢永遠都係無經驗喎，連噚日對般尼呢種牌面較弱的對手，你連後備都唔比佢地，咁你想點呢？

占士打攻中，最好，且打4411時，施格臣其實打後上攻中呢個位都會有貨交。噚日占士妙傳俾佢入攝，呢啲其實先真係施格臣的耍家波。呢兩年來佢愈打愈沉，始終係陣營唔啱佢(當然一個中場球員咁少殺著，係咪值4千幾萬身家已是另話)。

後面有杜靴尼及阿倫專責攔截或適時殺入禁區。

前鋒真係唯一一個唔使煩的位置，DCL無傷無病一定係佢。且杜辛做替補相信都可以。

reedlo16

Fuko~ 發表於 2020-12-6 16:31
係甸尼要休息禁長時間，應該要早D用NKOUKOU...就算要交下防守GE學費，只要進攻交足攻課，我相信隊波依然 ...

宜家諗返起，拜恩斯唔續約一年，原來對我地隊都幾傷。人算不如天算。HA

reedlo16

今年買人絕對係對症下藥TIM，只係阿倫近呢幾場有啲跌WALT，另外，占士真係身邊隊友配合唔到。(無人走位，廸布尼在陣都無計啦…)

朗X高文亂有錢亂咁買的遺害令及後幾名領隊都相當頭痛，艾拿戴斯過渡期，買人唔算多，杜辛合格啦，老禾…麻麻啦，點都唔算話佢亂咁買人。到施華，其實佢買賣都OK喎，宜家我隊最重要的兩員之一，李察利臣同甸尼就係施華買回來，佢果時都好想買杜靴尼，但時不與我，屈福特唔降班都唔會好似今年先肯降價。然後高美斯又係施華引入，佢未傷前，水準有目共睹。甘賓尼位置上其實都係對板，但…只能怪佢同施華都無運啦。

所以呢幾年第一慘係，朗奴高文年代買下太多貴價唔對板球員，及後兩個領隊買賣有好有壞，但衰在好個啲又成日傷，堅黑仔，壞個啲唔傷都唔多有咩作用，最重要散貨慢。諗落真係幾黑仔。

第二慘係，76唔通真係教開大球會，唔係好識去「執球隊、重建球隊」？希望我睇錯。俾多啲時間佢先再下定論。今年唔好要求咁高，維持係上半板，主力放係盃賽到還好。