Everton vs Wolverhampton Wanderers- 13th Mar, 2022 - 22:00

愛華戰士

其實大家心入面都對球隊有恨鐵不成鋼嘅感覺。本人其實已經幾多次指出球隊個缺點，當然知道英國果邊唔會睇到，好似已講到口臭，不過都想歸納一個最簡單嘅弱點。踢波真係不外乎停、傳、帶、射四個基礎能力，其他嘅係戰術、默契，體能，速度呢啲。要借鏡下過去20年英超可以稱霸嘅球隊究竟強喺咩地方。以呢幾年曼城同利記去睇，首先最簡單嘅係原則上正選11人停波、傳波、盤波、射門（呢個前鋒必需，中場唔射得都屬缺點） 頭三項可謂點都要得。利記左右閘羅拔臣/阿奴，後生有活力速度，走上走落，至少25碼以上長傳係到位嘅，亦適合落底線； 兩個中堅雲迪克同matip, 雲迪克無得講，身型先天已有優勢，長傳可以，攞波識用身位帶波唔算超好但十碼八碼夠用；matip 基本技術有，短傳控球可以，特別優秀係包波截波出腳準同路數好。利記因為有超級2閘，所以可踢433，3人中場好多時係2個較防守性嘅中場如軒達臣配基達（一個破壞體力型；一個控得又比到長波），另外加一個技術性較強嘅中場（艾簡達拿），軒達臣唔太盤得，但比到長波同可遠射；基達有遠射，同體能佳；艾簡達拿更力係四範都有，特別係細空間帶波；由於利記個踢法特點係三個前鋒進行超前迫搶，三個中場就中間負責第一層執漏，如果截唔到就後防黎截，超前迫搶當然會有失敗，但整體上除排對手個傳送組織能力強到曼城咁，否則未必下下可以經到中場做組織。當然利記3個前鋒，文尼爆速，靈活；沙拿雖然只匿喺右前位範圍自己做自己野，但前鋒入到波就乜都得。到中鋒祖達或法明奴都好，停波護波，自己搵食得，為隊友做掩護又得。10個球員都有能力推生個波向對方龍門攻嘅。（除2個中堅原則上唔會推咁上外）

愛華戰士

只要將愛記正選放落去比較，我先比前鋒，假如我地433- 左前李7，停傳帶射我比合格； dcl ,呢個中鋒真心講，空有身高，基本上停唔到波，停波唔係單純控個波落嚟，而係控完個波自己個節奏無亂，個波喺自已雙腳控制範圍下，dcl 呢個技術極弱，佢唔知道點樣攞個波係最有利，或者因為佢唔知咩位置現身落黎攞波係最合適，所以見佢喺最前一昧跳跳跳但無效，傳波個時機同技術英超我見最好嘅中鋒係哈里簡尼，佢速度唔太快，但隊友一走佢就回中場彈個波比隊友走，經過比到隊友半單刀機會，呢下波dcl 真係弱，佢腳嘅波底差，力水同意識都唔得，到帶波，真係sorry, 要dcl喺禁區頂位置用技術或速度突破直爆入禁區再射門嘅要求基本上係過分要求黎，無呢門技術；到右前鋒，當格雷同哥頓，控波護波都得，傳波嘅波格雷短波還可，中長波就一般；哥頓近幾場顯示到長傳有進步，盤帶上佢2個基本上係全隊速度最高二人。至於射門，其實幾個都有盲點，李7左路拉大位右腳射嘅成功率低，禁區外射嘅準繩度亦唔高，不能說佢好射得，李7有盤帶技術，但欠啲爆發力，亦無大哨朗拿度嘅射術；dcl嘅射門局限小禁區嘅頭搥/搶點撞射；格雷有左右腳遠射；哥頓就相對上無左腳，而且右腳射波唔太準同欠勁。所以好少見佢可以右腳cup返左腳左腳起。由於左中右三路都有盲點，所以個前鋒線就係「不銳」

愛華戰士

枯勿論是433定451，總之中場中路配置3個人係較合理嘅。2個偏防守，一個偏進攻，先講攻果個——- 最大問題就係呢個位，究竟應該邊個打？攻中至少應該係一個可以禁區頂起腳射到波嘅- 迪布尼/艾簡達拿/右天奴/基斯甸艾歷臣/ 奧迪加特/般奴費南迪斯，要再數仲有好多。愛記，用杜古希？抱歉，呢個炮台唔合格，唔知阿里是否勝任，我見佢熱刺時禁區邊係射得下嘅，我當佢得- 只係呢刻佢個態真係好一般。攻中要靈活，球感好，視野廣，杜古希放落去真係比較吃力。兩個偏防中，當係vdb 同阿倫，vdb 控波ok, 但佢習慣係反擊中快傳（唔係hold住波上腳果類），傳波10碼內可以，算準同決定正確嘅，所以做連系係適合嘅，帶波果樣相對平融啲，好少見vdb 一推20碼果種，始終局限左欠啲速度，射波由於佢距離龍門太遠，呢幾場見佢就算挨住禁區頂位置但啲腳頭都唔係好夠；阿倫，屬於踢法非一般嘅防中，控到波，短傳什至中距離都叫得（只係成功率唔太高）長傳近乎無，呢個弱點係佢同雲迪碧都面對緊嘅。阿倫由於都係速度唔快，要佢推10碼可以，再多就困難，射門就阿倫弱項。近年最比批評得多嘅中場組織，試問三人中場咁多缺點，點可能運作得好？

愛華戰士

到終極大鑊嘅4人防線，原本甸尼真係越諗越心痛。進攻力世界top5 嘅左閘，換來米高蘭高，暫睇真係水水地，踢法頗保守，比波唔太放膽。好少落到底，停波尚算可以，短傳都得，帶波唔好期望25碼成條邊咁上，如果只需10鬆啲碼帶上中場照計有條件，暫時睇佢防守時幾易比對手fake 到，但相信未適應英超節奏，相信會有改善，點都應該好過莊堅；正選中堅我當葛菲同米拿，可惜米拿傷得太密，佢配葛菲喺守力上我認為係比較穩，但問題係兩人個傳送力都弱，米拿比唔到10碼外，葛菲亦係傳波非常遲緩，好多時比波過份小心，而且比唔到20碼外半長傳，試問中堅比唔到長波點踢反擊？因為咁，所以米堅同賀基治有得玩，米堅撇除個防守力同自爆，本身可以傳下波，賀基治都傳到長波，只係佢2個比嘅長傳又唔太準，變相我地中堅只要放長波，基本上等放比返個控球權對方；四個中堅叫做賀基治推到15碼左右波，多啲都無。右閘高文，停波可以，佢習慣踩死個波添，傳波嘅時機好多時都好一般，應比時唔比，cup 多2腳至比，而且比時隊友啲位都唔靚；盤波好多時搏波，例如挑起過波2個人中間過，右路推埋中路一堆人中間去，成日見佢比人閘低，高文都叫射到下，只係又係中嘅機率偏低，無乜把握可言。整體防線個用波能力係非常低。由於2閘出擊個時機同把握都唔太理想，左路壓唔上；右路勉強上左落得慢，變相雙中堅同2閘個距離會幾遠，四人防線拉個防中最低限度5個要好似張網咁互相拉扯。閘位攞波1）要對前見到左或右中場；2）其中一個防中；3）身邊一個中堅；4） 龍門。最低要求係呢幾個options. 如果有腳力就直頭可以直線扯去中鋒位或左閘位轉右閘位，但呢2範我地左右閘都極弱。近幾場所見，閘位一上腳，個中場已被人夾死；個防中又現唔切身，往往波到閘位就只能回中堅或比龍；中堅攞波仲慘，對方一截我地防中2人，由於雙中堅無中距離傳送力，唔可以準礁放去左右中場，令到好多時只能比左右閘再比佢地明知左右中場無空位但都夾硬要比，所以又係對手一迫就斷。

Fuko~

愛華戰士 發表於 2022-3-15 00:18
到終極大鑊嘅4人防線，原本甸尼真係越諗越心痛。進攻力世界top5 嘅左閘，換來米高蘭高，暫睇真係水水地，踢 ...

簡單總結就係呢幾年買人基本上買到錯晒。人地買人買到係士氣升，大家一齊踢好波。
我地?買黎買去都係D水準差不多，最多一季好波GE球員。
特別係中堅，一個自爆到冇眼睇，另一個傷多過踢。
換領隊換又換得衰，基本上個個都唔同打法，係除左安76可以做到運用現有班底加兩三個就打到好波。
積積埋埋落黎GE問題...搞到今時今日禁，對自己班底有信心GE，真係降一降落去，清走晒大部分，再重新執過算。
我覺得林伯特肯教落去就俾佢教，唔肯就搵朗尼或者BIG BUNC.帶算。至於咩人會留低，我諗除左PICKFORD，大部分英人都應該會得低。但最有能力入波個D應該會走晒。

愛華戰士

事實係買人時只係頭痛醫頭腳痛醫腳。無前鋒咩就免費簽個返黎，跟住又整個朗當，無諗究竟個球員係咪啱用嘅。好似用占士咁，當然係安76個人傾向，但占士事實上係帶到創造力同入波比隊波，舊年1-0 贏利記，夠j 啦。無球員係完美嘅，之但係一隊波一定需要某啲元素，前鋒入球；攻中要能傳善射；防中要體能好控到場；中堅要硬朗位置感好，但一點最重要係基本功，呢啲就係強隊同弱旅最大分別。進攻時傳波現身走位接應；防守時幫手追波補位解圍，將皮球傳比最空嘅隊友。愛華頓宜家正選11個，最弱嘅我可以話係啲快速嘅中距離傳波走位。其實睇返足總杯贏業餘隊果場會睇到好多野。啲猜傳真係業餘水平，試問拍落英超水平，邊可能唔係一直輸？

Fuko~

愛華戰士 發表於 2022-3-15 16:11
事實係買人時只係頭痛醫頭腳痛醫腳。無前鋒咩就免費簽個返黎，跟住又整個朗當，無諗究竟個球員係咪啱用嘅。 ...

轉會買人呢家野，真係想再講一講...針對弱處買一個唔係問題，資源所限免簽一d人都冇問題。
我從來都唔覺得簽朗當有乜問題，唔使錢，只係出人工。唔掂就踢佢落後備，一隊波有一兩個呢d久唔久出黎救世，唔係咩問題。
我覺得最大最大問題係，我地d球員冇幾多個keep到狀態。你睇隻鴨鴨廢到...佢好返返黎，應該要入到三四球，係一球都入唔到。
打完一季半好波又打回原形...當然有部分原因係冇左甸尼同埋JAMES，但佢連埋門個腳執波都冇埋，根本係鬥心問題。班波自己士氣、鬥心同穩定性都奇差，佢地唔生性，你搵咩人教換走幾多人都係冇用。

ginger

Fuko~ 發表於 2022-3-15 16:56
轉會買人呢家野，真係想再講一講...針對弱處買一個唔係問題，資源所限免簽一d人都冇問題。
我從來都唔覺 ...

其實係啲領隊風格太唔同，換一個領隊基本上要換半隊人，但每個領隊得一兩季貨，如果唔係76走其實我地今季應該係收成有得爭下，一定唔會淪落到而家咁

愛華戰士

ginger 發表於 2022-3-15 17:06
其實係啲領隊風格太唔同，換一個領隊基本上要換半隊人，但每個領隊得一兩季貨，如果唔係76走其實我地今季 ...

如果隊波上季拼到個歐洲賽席位，安帥未必咁狠心咁就走，上季就係當然一來傷兵問題；二來打出黎始終又係有一段時間又係衰到貼地嘅頹。搞到安帥都無癮，皇馬一搶自然無，今屆安帥喺皇馬帶班友真係算好一般咋喎，人地聯賽攞硬咁滯；歐聯又反敗為勝出線。

Fuko~

愛華戰士 發表於 2022-3-15 18:31
如果隊波上季拼到個歐洲賽席位，安帥未必咁狠心咁就走，上季就係當然一來傷兵問題；二來打出黎始終又係有 ...

安76個邊都反映咗我哋班底有幾差有幾唔穩定。
佢功力一啲問題都冇，係我哋班球員差…