總算護級成功

Forever_Fan

【Now Sports】以後唔再稱呼莫耶斯做「莫天才」，講到尾係帶有貶意。今次揚威歐洲，盡洗當年領軍曼聯失敗所帶嚟嘅長久屈辱，同一切不快切割。家陣，佢已經係韋斯咸傳奇！

莫耶斯當年因為執教愛華頓頭頭是道，曾經率拖肥得第4名參戰歐聯（外圍賽落敗），直到今時今日仲係愛華頓歷來喺英超嘅最高排名。10年前費格遜退休，莫耶斯獲欽點成為接班人執教曼聯，以為一登龍門點知係噩夢開始，諷刺係當紅魔喺4月輸俾佢嘅舊「愛」拖肥，成為佢失飯碗嘅催命符。

對佢嚟講，最屈辱未必係宿敵利物浦球迷嘲諷佢為football genius，而係當會方決定痛下殺手，佢蒙在鼓裡，仲四周圍搵人加盟諗住為新一季組軍，最終淪為笑柄。喺曼聯經歷黑暗9個月後，一直孭住教曼聯唔掂嘅名聲，一個惡名，喺球壇浮浮沉沉，之後俾皇家蘇斯達炒魷、教新特蘭搞到降班，及至喺韋斯咸「又出又入」，捱咗多年，終於有起色。

前季佢領軍得到第6名，上季更殺入歐霸盃4強；以鎚仔幫嘅兵力，再次分心應付聯賽同盃賽當然唔容易，結果護級成功之餘，仲得到球會超過半世紀嘅首個歐洲錦標，即使係所謂「第三盃賽」，一啲都唔簡單。

「我唔會為呢啲前塵往事困擾。」莫耶斯好耐之前講過呢句話，係咪口不對心，唔知，只知佢苦盡甘來，單係今次功績夠佢爬番起身。以後仲有人稱呼佢做「天才」嗎？就算有，應該會係帶褒義嘅由衷之言。

咁多年過去，老莫終於拿到一個歐洲冠軍，下季又能升呢打歐霸，韋斯咸霉左咁多年，呢幾年係老莫帶領下終於吐氣揚眉，但愛隊過去十幾年都係不斷換領隊和護級中渡過，球會係英超最好的成績還是老莫帶領下的時間，莫財之下打出燒鵝的味道，我一直希望睇如果有錢的老莫係愛華頓會點，可惜十幾年都緣慳一面。

Everton2018

我剩係知道韋斯咸攞今次冠軍寶座的獎金和咁多場電視轉播廣告收益再加上上季佢地踢到尾再加埋下一季，為球會帶來超過一億收入，有錢咪可以從心所欲買人，有歐洲賽踢自然吸引到好球員加盟，我剩係知道老莫幫韋斯咸老闆賺咗唔少錢，所以下季希望戴冶可以效法老莫帶愛隊入歐洲賽

barker

Everton2018 發表於 2023-6-8 20:34
我剩係知道韋斯咸攞今次冠軍寶座的獎金和咁多場電視轉播廣告收益再加上上季佢地踢到尾再加埋下一季，為球會 ...

戴治想要麥湯去代替奥拿拿 ？

ngkk821

barker 發表於 2023-6-8 20:38
戴治想要麥湯去代替奥拿拿 ？

如果麥湯加4000萬，我覺得賣得過。