香港愛華頓迷討論區

標題: 主場對李斯特城 1/1/2019 20:30 [打印本頁]

作者: laukarwing 時間: 2018-12-31 22:48
標題: 主場對李斯特城 1/1/2019 20:30
希望再贏多一次。

作者: laukarwing 時間: 2018-12-31 22:49
希望Richarlison有入球吧！

作者: Fuko~ 時間: 2019-1-1 19:40
高文冇正選，TOSUN坐後備，鴨仔打正前。

作者: barker 時間: 2019-1-1 19:57

Fuko~ 發表於 2019-1-1 19:40
高文冇正選，TOSUN坐後備，鴨仔打正前。

JJ kenny add oil , DCL 唉....算喇

作者: witzz 時間: 2019-1-1 20:03
希望見到賭神落場帶帽

作者: aeroplane602 時間: 2019-1-1 20:50
Kenny幾上力

作者: 24cheung 時間: 2019-1-1 21:18

aeroplane602 發表於 2019-1-1 20:50
Kenny幾上力

可惜佢右邊有個豬隊友

作者: witzz 時間: 2019-1-1 21:19
鴨仔踢成點

作者: Fuko~ 時間: 2019-1-1 21:32
右邊成功進攻的次數真係屈指可數...對比左邊更加不堪入目。

呢場TOSUN似乎會有波踢，見佢對團隊D人密密傾。

作者: barker 時間: 2019-1-1 21:46
0-1

作者: Jassoo 時間: 2019-1-1 21:47
又送禮

作者: aeroplane602 時間: 2019-1-1 21:49
冇野講又自爆

作者: Fuko~ 時間: 2019-1-1 21:50
又自爆...

作者: 拖肥1878 時間: 2019-1-1 22:21
垃圾

作者: 拖肥1878 時間: 2019-1-1 22:21
睇到眼火爆

作者: witzz 時間: 2019-1-1 22:23
垃圾波，一早出賭神咪好，作用大過鴨仔好多。

作者: barker 時間: 2019-1-1 22:23
好喇 , 兩連敗 , 準備護級喇

作者: Fuko~ 時間: 2019-1-1 22:30
又輸波，下場打FA，應該可以試多D野。
下場都係唔好出鴨同禾仔啦...兩個都唔係打得好...
KENNY作為輪換都合格，但呢個表現唔覺得係時候取代高文。

作者: barker 時間: 2019-1-1 22:31
大家有無念頭炒馬高施華 ?

作者: 24cheung 時間: 2019-1-1 22:34

barker 發表於 2019-1-1 22:31
大家有無念頭炒馬高施華 ?

完全唔明自從冇神神輸比利狗後就一沉不起，之前真係踢得好地地

作者: 彈地 時間: 2019-1-1 22:34
有時做球員都幾無奈、你估禾確特自己都覺得無態但鬼叫領隊場場叫佢踢正選

至於卡法路雲根本下半場電視評述員未提過他名字、忍形人同踢少個無分別!!!
其實我們後備兵源都算足夠但領隊施華真係把九，用人不清，真情癈

作者: 八十年代的愛迷 時間: 2019-1-1 22:34
堅尼條友仔上半場一球撻Q，下半場一球！你老母甘Q垃圾去死啦！

作者: Fuko~ 時間: 2019-1-1 22:36

24cheung 發表於 2019-1-1 22:34
完全唔明自從冇神神輸比利狗後就一沉不起，之前真係踢得好地地

輸道氣LO...個場打擊我地球迷都接受唔到，對班球員直情係連自信都冇埋。

作者: 八十年代的愛迷 時間: 2019-1-1 22:38
我哋啲後生仔都係半場入替表現好過正選！

作者: 彈地 時間: 2019-1-1 22:42
左睇右睇，杜遜波底及迫波鬥志旺盛過卡法路雲, 真係唔明為何淪為後備過那條友仔！

作者: barker 時間: 2019-1-1 22:43

Fuko~ 發表於 2019-1-1 22:36
輸道氣LO...個場打擊我地球迷都接受唔到，對班球員直情係連自信都冇埋。

而家最重要找解決方法呀

作者: Everton_ 時間: 2019-1-1 22:48
B20入黎之後成條右路生哂
對比禾仔真係高下立見
喂禾仔你踢左十幾年右翼位都打到咁真係無野好講
SILVA仲可以場場放佢正選係咪想唔撈啊屌

作者: 拖肥糖 時間: 2019-1-1 22:56
繼續好睇唔好食，玩組織啦，簡單d沉底、死球，硬淨防守唔用

作者: ginger 時間: 2019-1-2 10:16
今場又係後面派膠輸波，其實堅尼真係唔多穩，情願出mina拍zouma，明顯地而家最穩反而係zouma，前面禾仔第N場垃圾表現仲係繼續有得踢，施華係咪有痛腳在佢手，另外鴨仔直情唔知佢係有落場，成個下半場波都冇掂過，反而tosun落黎作用幾明顯。究竟施華睇到D咩我地睇唔到的野?

作者: reedlo16 時間: 2019-1-2 10:40
論後防派膠，對方都有不少。有球係禁區前面對面交俾我地，又有球中堅又係禁區頂橫入中間比賭神，不過，人地食了我們的膠，我們則ON膠食唔到罷了。這便是前線把握力的問題。賭神又好，鴨仔又好都俾唔到信心我。

不過！呢場波我唔怪前線個個，最大問題係中場！進攻完全無板斧才是大問題，控傳滲入又唔得，兩邊出波又無準，李察利臣成日獨扭，同右面老禾一樣，成日想個人突破做空位…對方兩至三個埋來，你天才都未必過到吧，一味死去最終失埋控球又被人反擊…。尤其老禾真係唔知搞乜場場正選，場場無表現，其實究竟洛文係咪得罪方杖？即使唔出洛文，巴納特一出來都好過老禾多多聲。

作者: James_Beatkit 時間: 2019-1-2 10:41
Keane有呢D膠派真係唔意外
打兩個中堅其實預左
而且一對住對面有個快D既食梗塵
所以3中堅我會覺得啱我地多D

DCL DKLM
之前叫少做少錯
呢場叫唔做唔錯
成場搏左幾多腳波
唔好同我講冇波在腳都可以有佢作用
我淨係覺得好似打少個咁
賭神入黎起碼都叫做到少少野

MS你咁鍾意用禾仔就一係直接推佢打最頂啦
橫掂你都試左咁多個不同組合都冇效
好過擺右邊又傳唔到波

講對猁狗場波之後最大影響一定係Pickford
呢場簡單波都差D抱唔實
雪佢一兩場啦唔係實打沉佢

作者: 愛華戰士 時間: 2019-1-2 11:43
以事論事，一場主場比賽踢到無神無氣，攻不銳守不穩，在我立場....單憑呢一點....已經有理由話呢個馬高施華可以走得。

已經多番反映DCL 的水準有幾低，但呢條領隊唔知自己想點.....成日扮COOL....究竟平時點樣做訓練？
今場比較明顯係高美斯一開波見到幾球誤傳....狀況明顯唔夠....我相信同聖誕賽程太密同佢未適應聖誕英超快車期有關....畢竟佢慣左聖誕有假期同蒲得多。

李察利臣亦係聖誕狀況跌得幾差下.....巴西球員慣左呢D 場合要去玩.....

呢幾場睇得出球隊始終踢唔到利用進攻中場中路入滲的足球.....下下要分波去左右兩邊.....重點係左邊李察不會出波....自己硬爆又唔夠態....右邊禾確特亦係唔夠態....加埋中路個DCL 根本係隱形人......施格臣有兩三腳算係唔錯的傳送.....但又少左D 遠射....講到尾就係自已想完成個進攻都有困難.....試問點踢？
李斯特城根本完全唔需要制造任何攻勢.....彷彿隊隊波對愛華頓都只需要等你中堅同防中之間出現犯錯......再O係果個位置發動反擊....愛記就好容易失波

你快車期想輪換...我接受....但後備有杜遜, 陸文, 湯戴維斯你完全唔用？究竟想點？

其實夾硬用一個唔合格的中鋒去踢個4231 陣.....我會寧願隊波咁打

碧福特-----> 今屆已3次派膠......今場又有一球甩手.....係時候比後備龍出下
莊祖堅尼....蘇馬.....文拿/堅尼.....甸尼-----後邊4個.....唔可以話好大問題.....關鍵係中堅2人O係比波時要更有信心同長傳能力要提升.....當然重有係上來助攻的死球頂波要練習多D

2個防中....高美斯 + 基耶.....高美斯做控場....基耶做截擊.....今季見基耶多左負責比波向前..甚至上黎射波....其實唔係太壞事.....只係要謹慎D....如終佢個位一甩就比較大問題

比我攻中3人右至左會....禾確特....賓納特....李察利臣。左右兩個會偏向負責同前鋒交換位置同合作進攻...
賓納特係宜家成隊波唯一一個可以肯踢小組同做到D 10-20碼小組短傳O既中場球員....其實應該比佢同高美斯呢D 做多D 中場傳控同分波左右....咁我覺得係最' 活' 的打法.....

至於前鋒....講用波能力....我會寧願將施格臣放呢個位....等佢適當時同左右翼互換位做進攻.......施格臣係一個適得突然間走返出黎而一下彈入去左右的球員.....咁可以利用到李察同禾確特的突入速度....撕開對手防線...

作者: aeroplane602 時間: 2019-1-2 11:45
Keane 都要雪中堅犯低級錯誤

作者: 24cheung 時間: 2019-1-2 11:56

aeroplane602 發表於 2019-1-2 11:45
Keane 都要雪中堅犯低級錯誤

唔怪得佢，佢邊諗到個豬隊友解圍變回傳，喺咁突然時控定就真係有啲難

作者: 愛華戰士 時間: 2019-1-3 15:21

唔係話想批評愛隊......之但係我相信愛華頓已經錄得一個非常之不太光彩的英超數據。
就係好似連續六年對住所謂的BIG 6 球隊錄得0 勝劣績......----- 如果無計錯數就係36場......問題已經唔係一朝一夕

大家可以睇下今屆升班馬狼隊可以熱刺....水晶宮可以贏曼城......已失去主力的李斯特城亦然....
重要係有眼睇....對住幾隊速度高的特別係熱刺....我地近兩季場場輸5-6 球....對曼城車仔呢D 控傳波....我地每每只係囤重兵.....真心講.....踢乜？

愛華頓的最大弱點係個慢字......自從簡察斯基之後....基本上無一隻翼可以O係愛華頓踢到表現.....踢殘O既有雲達美迪, 迪路菲奧, 比耶列甸洛夫, 好明顯係個體系有問題。

中場控場能力不足.....守轉攻的反擊速度低.....令到大部份球隊對住愛華頓....基本上條防線企你前鋒後邊(或者看管住你個前鋒)......隊波就無板斧攻 ( 加上缺乏長程炮手)........任你中場點控點傳都好......完全局限晒個進攻套路.....以往有一套好AJ / M 賓特呢類前鋒靠一點速度去突入爭取入球.....但好睇狀態.....又有如卡希爾般頭搥較好.....可以搶到點後上入波.....到綜合D 盧卡古呢類可以靠身型同速度開山型前鋒.....進攻至較有門路。.....當你失去左呢D 前鋒或佢地狀態下跌....其他中場就無晒見樹.....呢D 正正係愛華頓面對緊最嚴重的問題。

作者: 愛華戰士 時間: 2019-1-3 15:32
李察利臣....杜遜呢D 係有質素.....但踢法上我覺得完全發揮唔到.....簡單D 講只係放個球員落某個位置...之後叫佢自己靠質素搵食。

作者: barker 時間: 2019-1-3 15:33

愛華戰士發表於 2019-1-3 15:32
李察利臣....杜遜呢D 係有質素.....但踢法上我覺得完全發揮唔到.....簡單D 講只係放個球員落某個位置...之 ...

咁你有乜解決方法俾大家研究下 ?

作者: 愛華戰士 時間: 2019-1-3 16:18
本帖最後由愛華戰士於 2019-1-4 13:51 編輯

barker 發表於 2019-1-3 15:33
咁你有乜解決方法俾大家研究下 ?

領隊需要了解球員特性，優點缺點至進行配置.....
杜遜係一個介乎射手與中鋒之間的箭頭.....感覺上不可以用佢踢451 或3241 果個單前鋒....如果要用杜遜....我會偏好佢打442....咁杜遜就可以配DCL ( 一個純粹負責爭頂做涉位的拍檔)....咁杜遜本身射術同走位其實唔差.....入波責任就會落左佢處......；

但杜遜如果配李察利臣....短期合作可能得...但長遠未必有效果....因為李察利臣踢法偏向個人化......佢並非正中鋒人選.....踢法較偏向靠左路.....佢需要的是一個中場可以比到KEY PASS 或同佢配合的隊友.....如果中路我地有古天奴之類 ( 或者希望賓納特打到呢個位....咁我相信李察利臣會較大發揮)

但好多時見領隊用李察利臣時....陣容就必定係單鋒....如李察打中鋒....因本身唔係搶點搶位型....所以無貨賣...如佢打左輔鋒.....中鋒就永遠係DCL......大家各搵食.......同中鋒企位太遠....根本無合作

真心講.....打單箭頭的話.....果個前鋒要求要好高.....隊波強如車仔.....你用一個莫拉達....大家睇到效果....形同隱形.....(除非你強如迪亞高哥斯達)....前邊開山.....再配後上夏薩特/ 韋利安/ 柏度呢D....否則根本無效果....
大家睇下幾隊前列隊....
利記大家憎還憎....法明奴呢個中鋒我個人認為踢得非常聰明.....當然左右沙拿文尼可以互串交义....無得比....但....人地踢法如是。( 大家留意下....當禾確特/ 李察利臣拎住波時.....我地個中鋒企緊咩位？)
曼城.....阿古路係一個純射手....左右腳射門把握力高....走位又靈活.....佢配合較多的是史端寧.....一個速度高拍檔.....( 甚至辛尼/ 捷西斯)...都係高速型.....射手的作用....就係當高速球員衝散左對方防線後....射手可以將D SECOND 波放入龍門....。
熱刺.....簡尼今屆其實打得唔好....但入波仍不少.....點解？簡單.....艾歷臣今屆已打得差 (其實少左致命輸送)....但有個孫興民速度硬衝.....加多個阿里輔鋒型入涉....

就算你問....李斯特城....衰衰都有個打反擊華DEE (可以自己用速度搵食的前鋒)
### 材料....我地唔係無.....但馬高施華......每每只係諗.....用單前鋒....加2個左右輔鋒.....( 但三個人係無傳送型中場串連同互相合作的)....結果只係左路傳中比人解圍....右路傳埋去比人頂出...。

如果你問我....杜遜最應該搭的.....雙箭頭.....可能係尼亞斯。

            杜遜    尼亞斯
李察利臣       賓納特    施格臣
            高美斯

甸尼    蘇馬    文拿    莊社堅尼

用尼亞斯前邊做迫搶.....杜遜停完波可以回比中場三個，然後自己轉身入...考慮到施格臣速度唔太高....佢好多時會移返中路停波(甚至遠射)....咁右路堅尼就可以開上黎出波.....；左路由於甸尼本身助攻力強....佢上時李察利臣就往往可以借甸尼過橋....自己帶波移入中路再睇下賓納特會唔會中場配合佢做ONE TWO，或者佢自己射....甚或睇杜遜有無空位比........如果咁踢.....你左右出波即時清晰左....( 由兩隻閘負責)....宜家隊波踢落就係兩隻閘要望下兩隻翼究竟會唔會落底....再自己衝埋落去....人員重叠.....而且令到中間接應的球員太少。

作者: barker 時間: 2019-1-3 17:13
尼亞斯快拜拜 , 我地傳緊巴塞右翼 Melcom ( loan deal )

作者: Fuko~ 時間: 2019-1-3 21:57

愛華戰士發表於 2019-1-3 16:18
領隊需要了解球員特性，優點缺點至進行配置.....
杜遜係一個介乎射手與中鋒之間的箭頭.....感覺上不可以 ...

愛華戰士兄好高質的文章!

我自己就冇睇得禁深入，於我而言，純粹只係右邊的攻勢太弱，入球集中係施古臣同李察利臣度...
佢地一俾人MARK死，我地就冇咩板斧。其實so far，我對施華係進攻方面的風格都有些少唔太明白。
你話佢打控球組織滲入又唔似，防反高速反擊又唔係...高壓迫搶有少少似，但守轉攻都唔太強。
我理解而家隊波人腳太多，球會唔太想呢個時期買人，借MALCOM我覺得係好方法，唔駛俾禾仔打又可以令進攻多一個點。
家下都係希望球會夏季清洗順順利利再集中補強番某D位算...呢季唯一希望係FA CUP有多D作為。

作者: toffeeweb 時間: 2019-1-4 10:30
愛華戰士兄好高質的文章! X2

我個人認為問題都係中場O個度
我地攻守轉換好慢傳送好慢唔爽快中場中好多時球到左然後先揾點交或者默契仲要時間建立但有時睇硬係覺得D中下游隊D波仲爽我地就好似要揾人交好難揾人交好易斷纜然後失誤就直接失波
個問題自從馬仔黎到第2季開始就經常出現中場硬係好難控好個波咁如果係咁 D翼幾勁都好難發揮到因為根本拉唔空D位俾佢地
究竟問題係咪我地中場太soft? 有時D五五波尤其右路高文O個邊經常唔夠搶咁而家禾仔 Bernard 大家都唔好指望佢地好搶得
基爺係好勤力但受身型所限高美斯亦唔係搶截型所以對住D硬橋硬馬的球隊又唔夠搶對前列隊又唔夠快
我係度諗我地係咪要一個好似杜哥利尼類咁gei中場先解決到問題?

作者: 愛華戰士 時間: 2019-1-4 11:32
感謝2位師兄的讚賞。
雖然我地作為球迷應該無乜機會改變唔到隊波的配置，但以波論波我地就係要咁講。

其實我地可以引用李斯特城拎冠軍果屆去做個比較。

前鋒︰靠快+ 爛打+ 衝撞型(後備).....華DEE (速度/ 射) + 剛崎慎司(爛打).....另加+ 烏路亞 (柱)
進攻中場︰馬列斯 (呢個無得講.....停傳扭射O係當屆都係一級水準)；仲有艾法禮頓呢類喜歡盤球但不扭死波的傳波類中場為前場作輸送
防中干提.....又係無得講....神級防中...；..亦有飲水哥呢類攔截及控場中場做串連

後邊候夫搭摩根雖然速度不高....但硬朗.....龍門舒米高呢D 唔敢話超級門將但犯錯少。
只能夠講.....當屆李斯特城好多係單天保至尊.....大家可能會話....車....干提馬列斯呢D 放邊隊都升LV 啦.......但領隊將呢D 有質素球員全力發揮其實好重要。

真心講....李察利臣質素....肯定係高的.......你問我我相信佢唔會差得過曼城捷西斯果個水平
賓納特....著過巴西10號....個人技術亦不需懷疑......踢法相類似的大衛斯華馬達....我唔敢話佢會比佢地好....但至少應該有個7 成吧
冰島臣.....直頭係冰島黃金一代的代表人物....傳射能力皆是英超一級.....( 盤帶會差D)

禾確特...杜遜呢類....即使大家唔可以話佢地好好....但至少唔會水得過烏路亞/ 剛畸慎司吧.......點解人地可以拎冠軍？無他的....球員知道自己在隊中的位置同作用。

當你隊波有一個大哨朗拿度....隊波進攻必定可以強化；但當你隊波有11個大哨....你隊波就會輸到大大鑊....呢個道理其實人人都明白....防型踢法同隊友配合係一隊球隊最重要的元素。
我地經常批評DCL.落場無表現。......當然第一個問題係整隊波踢法上配合唔到.....( 但另一個關鍵就係呢條友確確實實....作為前鋒....無論接應頭搥...中腰波橫傳涉位....到自己引球硬爆....到速度拋脫對手.......無一樣係有把握的。------------> 真心要問領隊....你放一個球員落一個位置....你個腦應該諗到呢個球員最經常做的動作係乜野...或者最大殺著係乜

# 我地諗大哨....就係禁區外20多碼拎到個波....單槍殺入射門
施丹...利用超凡控球能力....為其他隊友制造空位
卡路士....就係硬淨撋截同瘋狂衝落底....加怒射
派路.....施施然中場拎住個波再長傳

宜家我地有的進攻球員...
.李察利臣...我地會睇到佢好希望用自己技術左路殺入對方禁區 ( 但呢兩場波我見佢扭唔惦....即使入到禁區都無辦法射門.....去到呢步...其實係咪應該要檢討下佢呢個進攻MODE 係咪要改善？
DCL....你問我我真係唔知佢作為前鋒究竟打算用咩殺著去送個波入龍門......(如果你只係一個只等機會....等人地餵波入口的前鋒....好遺憾....你無可能做到頂級)...既然事實証明佢唔係一個入球量有保証的前鋒.....咁為何不將佢安安份份做一個二傳型前鋒呢？等佢為其他隊友做掩護....
禾確特...佢目標同李察利臣相若.....擺明係右路一拎到波就開TURBO 殺入禁區....盡可能射.....呢個踢法我反而BUY.....至少明確。當然入唔入就睇際遇同狀態。

作者: barker 時間: 2019-1-4 12:14

愛華戰士發表於 2019-1-4 11:32
感謝2位師兄的讚賞。
雖然我地作為球迷應該無乜機會改變唔到隊波的配置，但以波論波我地就係要咁講。

如果借到巴塞 Mallcom 會唔會在右邊好 D ?

作者: evertonarteta10 時間: 2019-1-4 12:33
本帖最後由 evertonarteta10 於 2019-1-4 12:43 編輯

toffeeweb 發表於 2019-1-4 10:30
愛華戰士兄好高質的文章! X2

我個人認為問題都係中場O個度

我一直讚成賣基爺, 或者買另一個防中取代佢.  我唔係話基爺差, 事實上佢傳送能力同視野真係好弱.  DOUCOURE我好少睇唔肯定, 其實DRINKWATER都可以, 貴D既BROZOVIC....

李臣個問題係必需要有新中鋒同右輔鋒先解決到, TOSUN走位同射術好, 但傳送同速度唔夠, 禾仔唔駛講, DCL同NIASSE大SAM波就岩打, 細膩波就免喇.  而愛華兄提到既攻中輸送問題, 我認為黎緊係BERNARD去做, 但首要都要入中鋒同右輔鋒, 否則BERNARD仍然會被用去邊線, 會好浪費.

而家係, MS到底要前鋒係開山劈石型, 定法明奴阿古路咁樣?  前鋒傳得唔多, MAXI GOMEZ算比較似樣.........

作者: 愛華戰士 時間: 2019-1-4 13:29

barker 發表於 2019-1-4 12:14
如果借到巴塞 Mallcom 會唔會在右邊好 D ?

BAKER 兄....其實點換點咁搵人替換....除左龍門之外....呢個做法未必可以改善到整隊波的表現

我唔太清楚MALLCOM 的踢法.......如果佢係純翼鋒.....底線出波.....咁其實我地已試過艾朗連儂，當然我地可以話連儂過到黎時水準已大不如前，但即使新右翼可以做到落底傳送.....我地有幾個多球員可以禁區搶到點入波呢？；如果你話佢係喜歡右路CUT 入禁區攻門....咁其實同禾確特甚或迪路菲奧差別亦不大。以上三位都係名氣唔差的右翼黎。但落到我地隊波始終唔可以保持到一個長期穩定的發揮。簡單D 講....我地踢法上發揮唔到兩翼落底呢種踢法。
( 反而我地過去十年落底出波最成名的只是2隻閘位球員。)----> 當你隊波係鼓勵兩閘出擊的時候.....無理由我地仲期望兩翼會發揮到乜野作用。
# 以巴西國家隊為例....卡路斯/ 卡富時.....巴西國家隊基本上係唔會擺2雙翼落去的.....只會加強中場中路的防控能力

作者: barker 時間: 2019-1-4 13:43
會唔會想起基佬特呢類中鋒？

作者: 愛華戰士 時間: 2019-1-4 13:48
本帖最後由愛華戰士於 2019-1-4 13:49 編輯

evertonarteta10 發表於 2019-1-4 12:33
我一直讚成賣基爺, 或者買另一個防中取代佢. 我唔係話基爺差, 事實上佢傳送能力同視野真係好弱. DOUCOUR ...

同意基耶宜家O係愛隊係一個雙面刃黎.....

論防務工作....全隊以基耶排第一....但問題係基耶的位置感問題。基耶好肯出擊搶波....成功率亦唔低....但重點就係即使搶到波....如何策動反擊係基耶最大的弱點(畢竟傳/ 射能力不足)....球隊如果要出基耶....中場必需要用雙防中。(至少一個拍檔要幫基耶補位。咁連帶就會令到隊波要打多個中場球員....犠牲左一個前鋒位置。

你話如果基耶好似費南甸奴, 保連奴, 呢類可以自己殺埋上去攻門....咁殺傷力自然會提升....。
所以話...宜家我地呢對雙人防中.....論表現我真心認為2個都係好球員黎....基耶比賽態度一流；高美斯控制球賽節奏亦佳....肯用波。我好開心見到早幾場高美斯殺上去射波果下表現...( 可惜最終都射唔入)....可能這減低左佢再上去助攻的信心。
但問題就係2位球員都唔夠進攻殺傷力....當你對防中真係只能夠做防務或者踢法被動的話....你隊波就只能夠被動。仲要最嚴重問題係....兩位球員相對上真係無長傳 ( 莫講話什麼罰球破門果D 啦)---- 如果對方知道你防中無辦法O係中場分波去30碼外.....佢地會好放心O係中路去.....即使比你搶甩....對方防線只需要將防守收窄......你兩個防中就做唔到任何反擊。( 點解派路咁有價值...論攔截力佢唔高....但佢有一招無敵長傳....同埋超級穩陣的控球)......就憑呢兩點.....對方防守球員就已經唔敢咁埋身去搶佢波.....因為擔心一埋去佢就長傳走人)

其實另一個可以減低防中壓力的踢法就係我地需要由前鋒開始做迫搶。只要前場開始做壓迫.....咁自然可減少防中HOLD 波的時間。之但係呢種踢法需要高體能。而且我地部份進攻球員....好似施格臣呢D 我觀察係佢本身的搶截技術不高.....真要執行時會有難度

作者: evertonarteta10 時間: 2019-1-4 14:13
本帖最後由 evertonarteta10 於 2019-1-4 14:19 編輯

愛華戰士發表於 2019-1-4 13:48
同意基耶宜家O係愛隊係一個雙面刃黎.....

論防務工作....全隊以基耶排第一....但問題係基耶的位置感問題 ...

yes, 非常獨到, 亦因此為何自從MS同BRANDS黎到球會後, 收購防中既消息越黎越多, 仲要比翼鋒中鋒仲要多, 正正就係咁解.

我地隊波並唔係入唔到波, 個問題就正正係創造機會同效率問題. 基爺絕對係好球員, 非常專業, 如要打上更高位置或者挑戰列強, 就需要更全面既球員.

我成日諗就係如果(只係如果)AG搭TORREIRA, 加埋BERNARD攻中就真係開心到飛起. 而家基爺攞波, 只要封線就好自然變成橫傳或後傳, 多1腳2腳就已經拖慢哂, 嚴重影響效率.

我唔需要基爺或者新防中需要殺上去攻門, 至少可以向"前"傳比進攻4人組等佢地搞掂

作者: evertonarteta10 時間: 2019-1-4 14:14

barker 發表於 2019-1-4 13:43
會唔會想起基佬特呢類中鋒？

BRANDS唔會諗超過25 26歲既球員......

作者: evertonarteta10 時間: 2019-1-4 14:34

愛華戰士發表於 2019-1-4 13:29
BAKER 兄....其實點換點咁搵人替換....除左龍門之外....呢個做法未必可以改善到整隊波的表現

我唔太清楚 ...

其實而家都唔興打落底傳中, 433同4231而家都變左2翼要CUT IN入去, 斬波都係比隻閘去搞. 特別英超冇HARRY KANE 盧卡古呢D大舊佬更加冇得玩.

卡雲尼, 伊巴點解值錢, 人地唔識打柱躉咩? 但係人地用對腳入波........

好簡單, 你諗下擺馬里奧高美斯落我地度會係點, 咁咪明囉

作者: evertonarteta10 時間: 2019-1-4 14:55

barker 發表於 2019-1-4 13:43
會唔會想起基佬特呢類中鋒？

就係呢類, 基奧特, DIEGO COSTA, MAY BE ANDRE SILVA......

作者: laukarwing 時間: 2019-1-4 16:50

愛華戰士發表於 2019-1-2 11:43
以事論事，一場主場比賽踢到無神無氣，攻不銳守不穩，在我立場....單憑呢一點....已經有理由話呢個馬高施華 ...

Well done. 中肯的文章。

作者: ginger 時間: 2019-1-5 13:28

愛華戰士發表於 2019-1-3 16:18
領隊需要了解球員特性，優點缺點至進行配置.....
杜遜係一個介乎射手與中鋒之間的箭頭.....感覺上不可以用 ...

欣賞師兄認真分析，不過講真，用得冰島神好難打雙箭頭，除非主場對弱隊，同埋以而家隊波唔用基耶基本上一定場場中出比人入4,5球。其實最大問題係前面完全冇默契個個企住黎踢，真心覺得隊波材料唔差，講真拍落阿記到睇人腳我地完全唔輸蝕，爭的係進攻的默契。

歡迎光臨香港愛華頓迷討論區 (http://hkeverton.com/forumnew/)